First Month Nisan Festival Of Pasach Fasah, yaʻní Masíh, #sing7gurpreet

Ḳhurúj 12;1-7 Phir ḲHUDÁWAND ne mulk i Misr meṉ Músá aur Hárún se kahá, kiYih mahína tumháre liye mahínoṉ ká shurú‘ aur sál ká pahlá mahína ho. Pas Isráílíoṉ kí sárí jamá‘at se yih kah do, ki Isí mahíne ke dasweṉ din, har shaḳhs apne ábáí ḳhándán ke mutábiq, ghar píchhe ek barra, le. Aur agar kisí ke gharáne meṉ barre ko kháne ke liye ádmí kam hoṉ, to wuh aur us ká hamsáya, jo us ke ghar ke barábar rahtá ho, donoṉ milkar, nafarí ke shumár ke muwáfiq ek barra le rakkheṉ; tum har ek ádmí ke kháne kí miqdár ke mutábiq barre ká hisáb lagáná. Tumhárá barra be‘aib, aur yaksála nar ho: aur aisá bachcha yá to bheṛoṉ meṉ se chunkar lená, yá bakriyoṉ meṉ se. Aur tum use is mahíne kí chaudahwíṉ tak rakh chhoṛná: aur Isráílíoṉ ke qabíloṉ kí sárí jamá‘at shám ko use zabh kare.Aur thoṛá sá ḳhún lekar jin gharoṉ meṉ wuh use kháeṉ un ke darwázoṉ ke donoṉ bázúoṉ aur úpar kí chaukhaṭ par lagá deṉ

AHBÁR 23;1

1Aur ḲHUDÁWAND ne Músá se kahá, ki 2Baní Isráíl se kah, ki ḲHUDÁWAND kí ‘ídeṉ, jin ká tum ko muqaddas majma‘oṉ ke liye i‘lán dená hogá, merí wuh ‘ídeṉ yih haiṉ. 3Chha din kám káj kiyá jáe, par sátwáṉ din ḳháss árám ká aur muqaddas majma‘ ká sabt hai; us roz kisí tarah ká kám na karná; wuh tumhárí sárí sukúnatgáhoṉ meṉ ḲHUDÁWAND ká sabt hai.
4 ḲHUDÁWAND kí ‘ídeṉ, jin ká i‘lán tum ko muqaddas majma‘oṉ ke liye waqt i mu‘aiyan par karná hogá, so yih haiṉ. 5Pahle mahíne kí chaudahwíṉ táríḳh ko shám ke waqt ḲHUDÁWAND kí fasah húá kare. 6Aur usí mahíne kí pandrahwíṉ táríḳh ko ḲHUDÁWAND ke liye ‘Íd i Fatír ho. Us meṉ tum sát din tak beḳhamírí roṭí kháná. 7Pahle din tumhárá muqaddas majma‘ ho; us meṉ tum koí ḳhádimána kám na karná. 8Aur sátoṉ din tum ḲHUDÁWAND ke huzúr átashín qurbání guzránná, aur sátweṉ din phir muqaddas majma‘ ho; us roz tum koí ḳhádimána kám na karná. 

Lúqá kí Injíl 22;7

Aur ʻIʹd i Fatír ká din áyá, jis meṉ Fasah zabh karná farz thá. 8Aur Yisúʻ ne Patras aur Yúhanná ko yih kahkar bhejá, ki Jákar hamáre kháne ke liye fasah taiyár karo. 

5Us ne un se kahá; Mujhe baṛí árzú thí, ki dukh sahne se pahle yih Fasah tumháre sáth kháúṉ; 16kyúṉki maiṉ tum se kahtá húṉ, ki Use kabhí na kháúṉgá, jab tak wuh Ḳhudá kí bádsháhat meṉ púrá na ho. 17Phir us ne piyála lekar shukr kiyá, aur kahá, ki Is ko lekar ápas meṉ báṉṭ lo: 18kyúṉki maiṉ tum se kahtá húṉ, ki Angúr ká shíra ab se kabhí na píúṉgá, jab tak Ḳhudá kí bádsháhat na á le. 19Phir us ne roṭí lí, aur shukr karke toṛí, aur yih kahkar un ko dí, ki Yih merá badan hai, jo tumháre wáste diyá játá hai: merí yádgárí ke liye yihí kiyá karo. 20Aur isí tarah kháne ke baʻd piyála yih kahkar diyá, ki Yih piyála mere us ḳhún meṉ nayá ʻahd hai, jo tumháre wáste baháyá játá hai. 

I Kurinthíoṉ 5;7Puráná ḳhamír nikálkar apne áp ko pák kar lo, táki táza guṉdhá húá áṭá ban jáo; chunáṉchi tum beḳhamír ho. Kyúṉki hamárá bhí Fasah, yaʻní Masíh, qurbán húá: 8pas áo, ham ʻíd kareṉ, na puráne ḳhamír se, aur na badí aur sharárat ke ḳhamír se, balki sáfdilí aur sachcháí kí beḳhamír roṭí se.

Yúhanná kí Injíl 10;9

Darwáza maiṉ húṉ: agar koí mujh se dáḳhil ho, to naját páegá, aur andar báhar áyá jáyá karegá, aur chárá páegá