maiṉ nahíṉ cháhtá,ki tum rúhání niʻmatoṉ ke báre meṉ beḳhabar raho.

 

I KURINTHÍOṈ 12

1Ai bháiyo, maiṉ nahíṉ cháhtá, ki tum rúhání niʻmatoṉ ke báre meṉ beḳhabar raho. 2Tum jánte ho, ki jab tum gairqaum the, to gúṉge butoṉ ke píchhe jis tarah koí tum ko le játá thá, usí tarah játe the. 3Pas maiṉ tumheṉ jatátá húṉ, ki jo koí Ḳhudá kí Rúh kí hidáyat se boltá hai, wuh nahíṉ kahtá, ki Yisúʻ malʻún hai; aur na koí Rúhuʼl Quds ke bagair kah saktá hai, ki Yisúʻ Ḳhudáwand hai.

4Niʻmateṉ to tarah tarah kí haiṉ, magar Rúh ek hí hai. 5Aur ḳhidmateṉ bhí tarah tarah kí haiṉ, magar Ḳhudáwand ek hí hai. 6Aur tásíreṉ bhí tarah tarah kí haiṉ, magar Ḳhudá ek hí hai, jo sab meṉ har tarah ká asar paidá kartá hai. 7Lekin har shaḳhs meṉ Rúh ká zuhúr fáida pahuṉcháne ke liye hotá hai. 8 Kyúṉki ek ko Rúh ke wasíle se hikmat ká kalám ʻínáyat hotá hai;

·         Ifisíoṉ 1:17 (URDR55)

ki hamáre Ḳhudáwand Yisúʻ Masíh ká Ḳhudá, jo jalál ká Báp hai, tumheṉ apní pahchán meṉ hikmat aur mukáshafe kí rúh baḳhshe

 

Lúqá kí Injíl 2;40 Aur wuh laṛká baṛhtá aur quwwat pátá gayá, aur hikmat se maʻmúr hotá gayá, aur Ḳhudá ká fazl us par thá.

 

AUR HIKMAT KI RUH KAHA SE HASIL HUTI HAI

AMSÁL 1

1 Isráíl ke bádsháh Sulaimán bin Dáúd kí amsál:

2 Hikmat aur tarbiyat hásil karne,

Aur fahm kí bátoṉ ká imtiyáz karne ke liye;

·         I Salátín 4:30 (URDR55)

Aur Sulaimán kí hikmat sab ahl i mashriq kí hikmat aur Misr kí sárí hikmat par fauqíyat rakhtí thí

 

·         Wá‘iz 7:19 (URDR55)

Hikmat sáhib i hikmat ko shahr ke das hákimoṉ se ziyáda zoráwar baná detí hai.

 

 

 

 

aur dúsre ko usí Rúh kí marzí ke muwáfiq ʻilmíyat ká kalám:

 

AMSÁL 1

1 Isráíl ke bádsháh Sulaimán bin Dáúd kí amsál:

4 Sádadiloṉ ko hoshyárí,

Jawán ko ‘ilm aur tamíz baḳhshne ke liye:

5 Táki dáná ádmí sunkar ‘ilm meṉ taraqqí kare;

Aur fahím ádmí durust mashwarat tak pahuṉche:

 

·         I Kurinthíoṉ 8:1 (URDR55)

Ab butoṉ kí qurbáníoṉ kí bábat yih hai. Ham jánte haiṉ, ki ham sab ʻilm rakhte haiṉ. ʻIlm gurúr paidá kartá hai, lekin mahabbat taraqqí ká báʻis hai.

 

9 kisí ko usí Rúh se ímán;

 

Romíoṉ 10 ;17 Pas ímán sunne se paidá hotá hai, aur sunná Masíh ke kalám se.

 

·         Romíoṉ 1:17 (URDR55)

Is wáste ki us meṉ Ḳhudá kí rástbází ímán se aur ímán ke liye záhir hotí hai, jaisá likhá hai, ki Rástbáz ímán se jítá rahegá.

 

·         II Kurinthíoṉ 4:13 (URDR55)

Aur chúṉki ham meṉ wuhí ímán kí rúh hai, jis kí bábat likhá hai, ki Maiṉ ímán láyá, aur isí liye bolá; pas ham bhí ímán láe, aur isí liye bolte haiṉ

·         Yúhanná kí Injíl 20:29 (URDR55)

Yisúʻ ne us se kahá; Tú to mujhe dekhkar ímán láyá hai; mubárak wuh haiṉ, jo bagair dekhe ímán láe.

aur kisí ko usí ek Rúh se shifá dene kí taufíq;

 

·         Yarmiyáh 17:14 (URDR55)

Ai ḲHUDÁWAND, tú mujhe shifá baḳhshe, to maiṉ shifá páúṉgá; tú hí bacháe, to bachúṉgá: kyúṉki tú merá faḳhr hai.

 

·         Amsál 17:22 (URDR55)

Shádmán dil shifá baḳhshtá hai: Lekin afsurdadilí haḍḍiyoṉ ko ḳhushk kar detí hai.

 

·         Zabúr 147:3 (URDR55)

Wuh shikastadiloṉ ko shifá detá hai, Aur un ke zaḳhm báṉdhtá hai.

 

kisí ko muʻjizoṉ kí qudrateṉ;

 

·         Aʻmál 2:22 (URDR55)

Ai Isráílío, yih báteṉ suno, ki Yisúʻ Násarí ek shaḳhs thá, jis ká Ḳhudá kí taraf se honá tum par un muʻjizoṉ aur ʻajíb kámoṉ aur nishánoṉ se sábit húá, jo Ḳhudá ne us kí maʻrifat tum meṉ dikháe, chunáṉchi tum áp hí jánte ho.

 

kisí ko rúhoṉ kí imtiyáz; kisí ko tarah tarah kí zabáneṉ; kisí ko zabánoṉ ká tarjuma karná: 11 lekin yih sab tásíreṉ wuhí ek Rúh kartí hai, aur jis ko jo cháhtí hai, báṉṭtí hai.

 

·         I Tímuthiyus 4:1 (URDR55)

Lekin Rúh sáf kahtí hai, ki áyanda zamánoṉ meṉ baʻz log, gumráh karnewálí rúhoṉ aur shayátín kí taʻlímoṉ kí taraf mutawajjih hokar, ímán se bargashta ho jáeṉge.

 

I YÚHANNÁ 4

1 Ai ʻazízo, har ek rúh ká yaqín na karo, balki rúhoṉ ko ázmáo, ki wuh Ḳhudá kí taraf se haiṉ yá nahíṉ;

2Ḳhudá kí Rúh ko tum is tarah pahchán sakte ho, ki jo koí rúh iqrár kare ki Yisúʻ Masíh mujassam hokar áyá hai, wuh Ḳhudá kí taraf se hai: 3aur jo koí rúh Yisúʻ ká iqrár na kare, wuh Ḳhudá kí taraf se nahíṉ: aur yihí muḳhálif i Masíh kí rúh hai, jis kí ḳhabar tum sun chuke ho ki wuh ánewálí hai, balki ab bhí dunyá meṉ maujúd hai

 

Yúhanná kí Injíl 14; 26 Lekin Madadgár, yaʻní Rúhuʼl Quds, jise Báp mere nám se bhejegá, wuhí tumheṉ sab báteṉ sikháegá, aur jo kuchh maiṉ ne tum se kahá hai, wuh sab tumheṉ yád diláegá.

I KURINTHÍOṈ 13

1Agar maiṉ ádmíoṉ aur firishtoṉ kí zabáneṉ bolúṉ, aur mahabbat na rakkhúṉ, to maiṉ ṭhanṭhanátá húá pítal, yá jhanjhanátí húí jháṉjh húṉ. 2Aur agar mujhe nubuwwat milí, aur sáre bhedoṉ aur kull ʻilm kí wáqifíyat húí, aur merá ímán yaháṉ tak kámil húá ki paháṛoṉ ko haṭá dúṉ, aur mahabbat na rakkhúṉ, to maiṉ kuchh bhí nahíṉ. 3Aur agar apná sárá mál garíboṉ ko khilá dúṉ, yá apná badan jaláne ko de dúṉ, aur mahabbat na rakkhúṉ, to mujhe kuchh bhí fáida nahíṉ. 4Mahabbat sábir hai, aur mihrbán; mahabbat hasad nahíṉ kartí; mahabbat sheḳhí nahíṉ mártí, aur phúltí nahíṉ, 5názebá kám nahíṉ kartí, apní bihtarí nahíṉ cháhtí, jhunjhlátí nahíṉ, badgumání nahíṉ kartí; 6badkárí se ḳhush nahíṉ hotí, balki rástí se ḳhush hotí hai; 7sab kuchh sah letí hai, sab kuchh yaqín kartí hai, sab bátoṉ kí ummed rakhtí hai, sab bátoṉ kí bardásht kartí hai. 8Mahabbat ko zawál nahíṉ; nubuwwateṉ hoṉ, to mauqúf ho jáeṉgí; zabáneṉ hoṉ, to játí raheṉgí; ʻilm ho, to miṭ jáegá. 9Kyúṉki bamárá ʻilm náqis hai, aur hamárí nubuwwat nátamám: 10lekin jab kámil áegá, to náqis játá rahegá. 11Jab maiṉ bachcha thá, to bachchoṉ kí tarah boltá thá, bachchoṉ kí sí tabíʻat thí, bachchoṉ kí sí samajh thí; lekin jab jawán húá, to bachpan kí báteṉ tark kar díṉ. 12Ab ham ko áíne meṉ dhundhlá sá dikháí detá hai; magar us waqt rúbarú dekheṉge. Is waqt merá ʻilm náqis hai; magar us waqt aise púre taur par pahchánúṉgá, jaise maiṉ pahcháná gayá húṉ. 13G̣araz ímán, ummed, mahabbat, yih tínoṉ dáimí haiṉ; magar afzal in meṉ mahabbat hai.